早排就同史友們介紹過西魏時期到唐朝初期嘅士兵由於「府兵制」嘅關係，所以即使係為國打仗都好，就連裝備都需要自己購買。而喺秦朝，呢個制度亦都有所不同，因為秦朝嘅士兵直頭係冇糧出，但到底點解佢哋仍然肯為國家賣命呢？
秦朝士兵組成嘅軍隊號稱「虎狠之師」，先後攻破六國並且統一天下，就咁睇戰績絕對唔似一支冇糧出嘅軍隊，咁到底秦始皇用咗咩手段去激化軍隊呢？其實喺商鞅對秦國進行變法之後，秦國基本上就已經變成一個軍事國家，人民嘅工作不外乎就係耕田、生產軍糧以及離家參軍，所以基本上冇乜選擇。
而離家參軍就係眾多選擇當中最能出人頭地嘅一樣！事關當時軍中有個制度叫做「軍功爵制」，士兵可以通過軍功而獲得官職財富。成個「軍功爵制」分成20級，由1級「公士」到20級的「徹侯」都會有相應嘅獎勵，而計算軍功嘅方法亦都好簡單，每斬到一個敵軍精銳前鋒人頭，就可以直接得到一級爵位，並賜田一頃、宅一處等等，斬獲嘅人頭愈多，所得到嘅爵位、財富都相應愈多，所以即使唔出糧，秦軍都仍然拼命殺敵。
原圖嚟自網絡